Ամփոփվեց «Օժտված երեխաներ – Քվանտ 2017» մրցույթը

Հունիսի 5, 2017

Դպրոցական անցուդարձ

Ս/թ մայիսի 7-ին և 9-ին «Քվանտ» վարժարանում տեղի ունեցավ «Օժտված երեխաներ – Քվանտ 2017» մրցույթը։ Արդյունքներն ամփոփվեցին մայիսի 20-ին՝ վարժարանի դահլիճում։ Մրցույթի հաղթողները տնօրենության կողմից ստացան հավաստագրեր։

Երևանի պետական համալսարանի և «Քվանտ» վարժարանի ջանքերով կազմակերպվող «Օժտված երեխաների» մրցույթն անցկացվում է արդեն 21-րդ անգամ՝ սկսած 1996 թ․-ից։ Տարեցտարի ավելանում են մրցույթին մասնակցող աշակերտների թիվը, ինչպես նաև ընդլայնվում է մրցույթի աշխարհագրությունը․ այս տարի մրցույթին մասնակցեցին Հայաստանի Հանրապետության և Արցախի թվով 84 դպրոցների 286 աշակերտներ, որոնցից 42-ը ճանաչվեցին հաղթող։ Նրանք արժանացան տարբեր արտոնությունների՝ նոր ուսումնական տարվանից ուսումը շարունակելով «Քվանտ» վարժարանում՝ օգտվելով մինչև 100% զեղչային համակարգից։ Նրանցից առավելագույն միավորներ վաստակած և սոցիալապես անապահով ընտանիքների երեխաները կարժանանան նաև «Կողբ» և «Քվանտի շրջանավարտ» բարեգործական հիմանդրամների կրթաթոշակներին։ Ի դեպ, կրթաթոշակ տրամադրող հիմնադրամների ղեկավար կազմը վարժարանի շրջանավարտներն են, ովքեր ժամանակին եղել են «Օժտված երեխաներ» մրցույթի հաղթողներ։ Մրցույթի ընձեռած հնարավորության շնորհիվ հանրապետության տարբեր մարզերի և մայրաքաղաքի շնորհալի աշակերտները հանրապետական և միջազգային օլիմպիադաներում հասնում են մեծ հաջողությունների, իսկ նրանցից շատերը կրթությունը հետագայում շարունակում են աշխարհի առաջատար համալսարաններում (Սթենֆորդ, Օքսֆորդ, Քեմբրիջ, Մասաչուսեթսի տեխնոլոգիական ինստիտուտ և այլն)։