Մասնագիտական կողմնորոշում

Հունիսի 1, 2017

Դպրոցական անցուդարձ

Մասնագիտության գիտակցված ընտրությունը

Ձեր աշխատանքային հաջողությունների հիմքն է:

 

Ջերմուկի Մ.Գորկու անվան թ. 1 հիմնական դպրոցի 9-րդ դասարանում միջոցառում է վերոհիշյալ թեմայով: Ներկա էին տարբեր մասնագիտության տեր հյուրեր: Ցանկալի էր լսել նրանց կարծիքները, խոհերը, տեսակետները իրենց մասնագիտությունների վերաբերյալ և մեկ անգամ ևս ճշտելու, թե արդյոք ճիշտ ընտրություն են արել /կամ դեռ չեն արել/ երեխաները:

Այդ ո՞ր աղջիկն ու տղան չեն տարվում ռոմանտիկ երազանքներով, չեն երազում արտասովոր արկածների, և նույնքան արտասովոր մասնագիտությունների մասին. անել այն, ինչ մինչ այդ ոչ ոք չի արել:

Երազանքը`երազանք, սակայն անհրաժեշտ է ճիշտ ուղղություն տալ դրանց, ճիշտ հունի մեջ դնել այդ երազանքը` հետագայում չընկճվելու, չհիասթափվելու համար:

ՄԱՍՆԱԳԻՏՈՒԹՅԱՆ ԸՆՏՐՈՒԹՅՈՒՆԸ ՃԱԿԱՏԱԳՐԱԿԱՆ ՄԻ ՀԱՆԳԱՄԱՆՔ Է, ՈՐԸ ԸՆԴԳԾՈՒՄ Է ՄԱՐԴՈՒ ԿՅԱՆՔԻ ԱՊԱԳԱ ՈՒՂԻՆ: Եվ այդ հանգամանքից է կախված հաճախ` երջանի՞կ է լինելու մարդը, թե՞ պարզապես գոյությունն է քարշ տալու, հաջողա՞կ է լինելու, թե՞ անճար, հաճույքո՞վ է աշխատանքի գնալու, թե՞ պարտականությունը ձանձրույթ է հուշելու, դիպլոմը հա՞ց է բերելու, թե՞ պարզապես ծածկվելու է մոռացության մշուշով:

Իրականում տարբեր գործոններ են որոշում երեխայի ապագա մասնագիտությունը` սկսած նրա բնավորության գծերից, նախասիրություններից, ունակություններից, մինչև ծնողների, ուսուցիչների խորհուրդներն ու ուղղորդումները, մեր օրերում նաև ուսման համար պահանջվող գումարը, մոդայիկ լինելու միտումը և այլ դրդապատճառներ:

Պետք է նշել նաև մի կարևոր հանգամանք, որ այդ ընտրությունը նաև պետական, ազգային կարևորություն ունեցող գործ է: Այն ոչ միայն շահ բերող, բարեկեցություն բարելավվող պետք է լինի, այլ նաև պետք է նպաստի մեր երկրի զարգացմանը, բարօրությանը:

Ահա այս և նման մտահոգիչ հարցեր էր ներառում միջոցառումը` սպառիչ պատասխաններ ակնկալելով մասնագետներից, ովքեր ներկայացնում էին իրենց աշխատանքների առավելություններն ու առանձնահատկությունները` նշելով հատկապես, որ պետք է անվերապահորեն սիրել տվյալ աշխատանքը և ապրել նրանով, այլապես կյանքը կվերածվի դժոխքի:

Միջոցառումը հագեցված էր նաև գեղարվեստական մասով, տեսանյութերով և երեխաների ընտրած մասնագիտությունների վերաբերյալ տեսանյութերով և սեփական խոսքով:

9-րդ դասարանի դասղեկ` Ա.Ալեքսանյան