Վերջին դաս

Մայիսի 29, 2017

Դպրոցական անցուդարձ

Կապանի հ.13 հիմնական դպրոցում արդեն բարի ավանդույթ է դարձել յուրաքանչյուր տարի՝ մայիսին, մեծ շուքով անցկացնել 9-րդ դասարանցիների ավարտական հանդեսը: 
Աշակերտները հավաքվել էին՝ ոչ թե միմյանց հրաժեշտ տալու (չէ՞ որ նրանք դեռ երկար ճանապարհ են անցնելու միասին), այլ երախտագիտության խոսք ասելու իրենց ուսուցիչներին, սիրելի տնօրեն՝ Զավեն Ստեփանյանին, և դպրոցի յուրաքանչյուր աշխատակցի: Նրանց կարգախոսն էր. «Երազի′ր, աշխատի′ր և գնահատի′ր»: Դպրոցը աշակերտներին սովորեցրել է ապրել այս սկզբունքով: Նրանք սովորել են, որ հարկավոր է երազել լավ կրթության, լավ երկրի, լավ ապագայի մասին, հարկավոր է աշխատել երազանքը կյանքի կոչելու համար, հարկավոր է գնահատել ունեցածը, դրա վրա նորն ավելացնելու համար:
Իններորդցիները հրաժեշտի խոսքեր հղեցին առաջին ուսուցիչ՝ Հասմիկ Մելքոմյանին և դասղեկ Էդգար Հարությունյանին: Միջոցառումն ավարտվեց իններորդցիների խոստումով, որ ուր էլ լինեն , ավելի լավ են սովորելու, շարունակելու են բարի գործեր անել ու հզորացնել մեր հայրենիքը:

Սիրելի շրջանավարտներ,
Ընդունեք մեր ջերմ շնորհավորանքներն ու բարեմաղթանքները դպրոցում ուսումնառության վերջին օրվա և վերջին դասի կապակցությամբ:
Դուք հրաժեշտ եք տալիս պատանեկան տարիներին, հարազատ դարձած կրթօջախին` դպրոցին, մտնում եք կյանքի մի նոր փուլ, որտեղ պահանջվելու է լինել առավել լուրջ ու պատասխանատու: Սա այն պահն է, որ պետք է կատարեք ապագայի համար ճիշտ ընտրութուն և ընտրեք ձեզ համար հոգեհարազատ մասնագիտություն:Բարի երթ ,սիրելի շրջանավարտներ:

ՄԿԱ գծով փոխտնօրեն Ժաննա Վարդանյան