Տավուշի մարզի ԻՄՓԱՔԹ ակումբների նոր ծրագրերը

Մայիսի 26, 2017

Լուրեր կազմակերպություններից

Տավուշի մարզի Ազատամուտ և Այգեհովիտ համայնքների ԻՄՓԱՔԹ ակումբները, որոնք ունեն մոտ երեք տարվա պատմություն, համայնքներում իրենց ակտիվ գործունեության հերթական արդյունքները արձանագրեցին, իրականացնելով համայնքային նոր ծրագրեր:  Ոչ ֆորմալ կրթական մոդուլների ուսուցմամբ գործող ակումբները խորապես ուսումնասիրելով «Առոջնորդություն» կրթական մոդուլը, հանդես եկան որպես համայնքային առաջնորդներ իրենցից կրտսեր երեխաների համար՝ նախաձեռնելով հետաքրքիր, ուսանելի միջոցառումներ: Նշենք, որ ակումբներում ձեռք են բերված գիտելիքները և կարողություններն առաջնորդության, աշխատունակության, ակտիվ քաղաքացիության և այլ ասպարեզներում, լիովին գործածում են իրենց նախաձեռնությունների ընթացքում:  Ակումբների  նպատակն է նպաստել  երեխաների  քաղաքացիական  ու  հասարակական կարողությունների ձևավորմանը: Այգեհովիտի ակումբն իրականացրեց «Բարի գործենք միասին» թվով 5-րդ նախագիծը, որի նպատակն էր ներգրավվել համայնքի մոտ 22 երեխաներին  կրթա-մարզական և բնապահպանական նախաձեռնություններում՝ նպաստելով նրանց նույն գաղափարի շուրջ համախմբմանը և բարձրացնել համատեղ գործելու գիտակցումը: Նախագծի շրջանակում կազմակերպվեցին մեկօրյա միջոցառումներ՝ սպորտլանդիա, ժամանցային խաղեր և մշակույթի տան բակում դեկորատիվ ծառերի տնկում: Իսկ Ազատամուտի ակումբը ձեռնարկեց 5- րդ համայնքային ծրագիրը «Մեկ համայնք, մեկ ընտանիք» անվամբ: Այս անգամ ակումբը համագործակցեց ՀՀ Ոստիկանության Տավուշի մարզային վարչության Իջևանի բաժնի համայնքային ոստիկանության բաժանմունքի հետ: Ծրագրի շրջանակում համայնքի 15 ընտանիքների տրամադրվեց սոցիալական աջակցություն` սննդի տեսքով, իսկ այդ ընատնիքների երեխաների համար կազմակերպվեցին ժամանցային և սպորտային խաղեր, որոնց ավարտին երեխաները ստացան գրենական պիտույքներ։ Ակումբի անդամ, 15 ամյա Էդիտան նախագծի վերաբերյալ նշեց.«Ծրագրի արդյունավետությունը նրանում էր, որ այլոց հանդեպ անտարբեր չլինելու որակներ զարգացրեց մեզանում: Նաև մեզ առաջնորդներ զգացինք, կազմակերպելով շատ երեխաների հետաքրքիր առօրյան, որի կարիքը նրանք ունեին»:

ԻՄՓԱՔԹ  ծրագիրը մշակվել է Ռումինիայում «Նոր Հորիզոններ» հիմնադրամի կողմից և Հայաստանում իրականացվում է Վորլդ Վիժն Հայաստանի կողմից: 2017թ. դրությամբ  ավելի քան 35  ԻՄՓԱՔԹ ակումբներ են գործում  Հայաստանի 6 մարզերում, որոնք ունեն  550-ից ավելի անդամ: Նպատակն է համախմբել երիտասարդությանը  ԻՄՓԱՔԹ  խմբերում, աջակցել նրանց ձեռք բերել քաղաքացիական հասարակության և աշխատանքային շուկայում մրցունակ լինելու համար անհրաժեշտ կարողություններ:

ՎՎՀ Իջևանի Տարածքային ծրագրի գրասենյակ