Արվեստն իմ կյանքում

Նոյեմբերի 22, 2024

Դպրոցական անցուդարձ

Մշակութային կրթությունը բոլոր ժամանակներում ու բոլորի համար առանձնահատուկ նշանակություն ունի:

ՀՀ ԿԳՄՍ նախարարությունը 2024 թվականը հայտարարել է մշակութային կրթության տարի, որի նպատակն է խթանել սովորողների ստեղծագործականությանն ու նախաձեռնողականությանը՝ արժևորելով սեփական ինքնությունը, ընտանիքի, համայնքի, պետության դերը, ձևավորել սեփական մշակութային բազմազանությունը, մշակութային գրագիտությունն ու ճաշակը, ճանաչել հայ և համաշխարհային գրականությունն ու արվեստը, ասել է թե՝ զարգացնել սովորողների մշակութային կարողունակությունները:

Մշակութային կրթության տարվա շրջանակներում մեր դպրոցում մշակվեց կրթամշակութային միջոցառումների ծրագիր՝ «Արվեստի օրեր դպրոցում» խորագրով: Դպրոցի տնօրինության, առարկայական մեթոդական միավորումների, 1-4-րդ դասարանների դասվարների, դասղեկների, աշակերտական խորհրդի համատեղ ջանքերով 2024 թ. նոյեմբեր ամսվա 3-րդ շաբաթում իրականացվեցին կրթամշակութային բազմաբնույթ բովանդակալից միջոցառումներ, ձեռքի և նկարչական աշխատանքների ցուցահանդեսների բացում՝ 1-4-րդ դասարաններում՝ «Արվեստն իմ կյանքում» խորագրով, 5-11-րդ դասարանների սովորողների մասնակցությամբ՝ «Հայաստանը ես եմ» խորագրով:

Դպրոցի «Տիկնիկային թատրոն» ուսումնական խմբակը 1-4-րդ դասարանների սովորողների համար բեմականացրեց Հովհաննես Թումանյանի «Անխելք մարդը» հեքիաթը, կազմակերպվեցին հայկական ժողովրդական երգերի ու պարերի նորովի կատարումներ:

Աբոնեմենտային ծրագրի շրջանակներում 7-րդ դասարանի աշակերտներն այցելեցին Հայաստանի պատմության թանգարան, որտեղ դասը վարեց դասղեկ Մ. Միլիտոնյանը, ով սովորողներին ներկայացրեց Վանի թագավորության ժամանակաշրջանի, մեզ հասած ուրարտական սեպագիր տեքստերի, մեր բնօրրանից՝ պատմական Լճաշենից հայտնաբերված հարուստ գտածոների, բրիտանական թանգարանից բերված Անահիտ աստվածուհու բրոնզե արձանի մասին, «Սինեմա Սթար» կինոթատրոնում դիտեցին «Մեդալի հակառակ կողմը» կինոֆիլմը, Հ. Պարոնյանի անվան երաժշտական կոմեդիայի թատրոնում դիտեցին « Ուշ լինի, նուշ լինի» հետաքրքիր ներկայացումը:

9-րդ դասարանի աշակերտներն այցելեցին Խաչատուր Աբովյանի անվան տուն-թանգարան, ստացան նոր գիտելիքներ Մեծ Լուսավորչի կյանքի ու ստեղծագործության դրվագների մասին, այցելեցին Պատանի հանդիսատեսի թատրոն, դիտեցին Վ. Պետրոսյանի «Վերջին ուսուցիչը» ներկայացումը:

12-րդ դասարանի աշակերտները էքսկուրսիա մեկնեցին Դիլիջան քաղաքի Երկրագիտական թանգարան-պատկերասրահ, Գոշավանք, Հաղարծին վանական համալիրներ:

Այս ամենը դարձավ կրթության մաս, դպրոցն աշխատեց համագործակցել մշակութային հաստատությունների հետ:

«Արվեստ և արհեստ» առարկայի ուսուցչուհի Ամալյա Սարիբեկյանի նախաձեռնությամբ, 10-րդ դասարանի աշակերտների մասնակցությամբ իրականացվեց կրթամշակութային յուրօրինակ նախագիծ «Լույսի վարպետը» խորագրով՝ նվիրված գեղանկարի մեծ հսկա, նկարիչ Մարտիրոս Սարյանի անգնահատելի արվեստին, արվեստ, որը հայի դեմքն է ու Հայաստան աշխարհի այցեքարտը:

«Դիմանկարներ, նատյուրմորտ, գույն, գույների խաղ, լույս, ծաղիկներ, երազանք, թափանցիկ օդ, ձյունափայլ սարեր, արգավանդ հողի գույներ, արևի խաղ խաղողի վազերի հետ, ծաղկող նռնենի…», ահա այն, ինչ երազել է մեծ նկարիչն ու բնածին օժտվածությամբ վրձնել իր անմահական, գողտրիկ, լույսերով, ջերմությամբ ու գույներով հարուստ կտավներում, որոնցով մենք ճանաչում ու սիրում ենք Հայաստանը, տեսնում հայի դիմագիծն ու աշխատասիրությունը:

«Արվեստն իմ կյանքում» խորագրով ցուցահանդեսի բացմանը ներկա էր և գեղեցիկ տպավորություններով կիսվեց «Դասավանդի՛ր Հայաստան» հիմնադրամի առաջնորդության զարգացման ղեկավար Հակոբ Վարոսյանը:

Ուսումնական տարվա ավարտին կշարունակվեն սովորողների այցելությունները Հայաստանի պատմության թանգարան, Մ. Սարյանի, Հովհ. Թումանյանի անվան թանգարաններ, Կոմիտասի անվան պանթեոն, թատրոններ և համերգասրահներ:

Դպրոցում մշակութային կրթությունն արդյունավետ իրականացնելով՝ սովորողները ճանաչեցին իրենց հայրենիքը, ներկայացրին ուշագրավ տեղեկություններ Հայաստանի պատմության, մշակույթի, պատմամշակութային ժառանգության օբյեկտների մասին, դրսևորեցին մշակութային ընկալման ու արժևորման կարողություններ՝ արվեստի միջոցով ստեղծագործաբար արտահայտելով սեփական գաղափարներն ու հույզերը՝ ցուցաբերելով մշակութային իմացություն և դրա հետ մշտապես, ողջ կյանքում հաղորդակցվելու ձգտում և կարևորեցին իրենց՝ հայկական պատմամշակութային արժեքների ժառանգորդ և պատասխանատու լինելը դրանց պահպանման, զարգացման և տարածման գործում:

Ա. ՄՈՒՐԱԴՅԱՆ
Լճաշենի Ա․ Տեր-Գրիգորյանի անվան միջնակարգ դպրոցի տնօրեն