Ժաննա Անդրեասյանը հանդիպել է «Սփյուռքի երիտասարդ դեսպան» ծրագրի մասնակիցներին

Հոկտեմբերի 1, 2024

Լուրեր կազմակերպություններից

ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր հանդիպել է 2024-2025 թթ. «Սփյուռքի երիտասարդ դեսպան» ծրագրի մասնակիցներին։

Հանդիպմանը ներկա է եղել նաև ԿԳՄՍ նախարարի տեղակալ Արթուր Մարտիրոսյանը:

Այս տարի ծրագրին մասնակցել է 20-35 տարեկան 28 սփյուռքահայ՝ 18 երկրից: Ծրագրի նպատակն է հնարավորություն ընձեռել սփյուռքահայ երիտասարդներին ընդլայնելու իրենց պատկերացումները Հայաստանի քաղաքական, սոցիալական, տնտեսական և այլ խնդիրների մասին, աջակցել համայնքային կյանքում նրանց առավել ներգրավմանն ու գործունեության արդյունավետության բարձրացմանը:

ԿԳՄՍ նախարար Ժաննա Անդրեասյանը ողջունել է երիտասարդ դեսպաններին՝ կարևորելով նմանատիպ հանդիպումները՝ միասնաբար քննարկելու ամենակարևոր խնդիրների լուծման ուղիների շուրջ պատկերացումները:

«Շատ եմ կարևորում ձեր դերը, քանի որ բազմաթիվ հարցերի վերաբերյալ հաճախ կարիք է լինում հասկանալու նաև այլ երկրների փորձը, մեզ համար կիրառելի տարբերակները՝ այս դեպքում վերաիմաստավորելով սփյուռքի ներուժը, որպեսզի կարողանանք մեր գործողություններն ուղղել դեպի կարողությունների զարգացում և դրա համար պայմանների ձևավորում»,- ասել է նախարարը:

Ժաննա Անդրեասյանը, մասնավորապես, անդրադարձել է նախօրեին «ՔՈԱՖ» հիմնադրամի կողմից Արմավիրի մարզի Մյասնիկյան բնակավայրում համայնքային կյանքի զարգացմանն ուղղված ՍՄԱՐԹ կենտրոնի բացմանը: Այն, ըստ նախարարի, նմանատիպ ծրագրերի միջոցով սփյուռքի՝ մեր պետության զարգացման մասը դառնալու օրինակելի գործընթաց է:

Նախարարը նշել է նաև, որ կրթության, գիտության, մշակույթի, սպորտի և երիտասարդության ոլորտներում այժմ բարեփոխումների ակտիվ փուլ է՝ ուղղված թե՛ ենթակառուցվածքների, թե՛ բովանդակության բարելավմանը:

Ժաննա Անդրեասյանն առանձնակի անդրադարձել է սփյուռքի կրթամշակութային կյանքի զարգացմանն ուղղված ծրագրերին: Ընդգծվել են սփյուռքում գործող կրթամշակութային կառույցներին հատկացվող նոր դրամաշնորհային ծրագրի կարևորությունը, ինչպես նաև ուսուցիչների վերապատրաստման, դասագրքերի տրամադրման և առցանց հարթակում դրանց հասանելիության, ՀՀ բուհերում ու քոլեջներում ուսանողների կրթության ապահովման և այլ շարունակական ծրագրերը:

«Ձեր՝ որպես սփյուռքի երիտասարդ դեսպանների ամենակարևոր գործիքակազմերից մեկը պետք է լինի իրազեկվածության ապահովումը՝ ուղղորդելու այն մարդկանց, որոնց համար իրականացվող ծրագրերը կարող են լինել իրապես վճռորոշ»,- ասել է նախարար Ժաննա Անդրեասյանը:

Երիտասարդ դեսպաններին ներկայացվել են նաև հայագիտության զարգացմանն ուղղված գործընթացները, մասնավորապես՝ Մատենադարանում կազմակերպված Հայագիտական միջազգային կոնգրեսը, որը, ըստ նախարարի, մեծ հաջողություն է ունեցել, և նպատակ կա այն դարձնելու ամենամյա: Պետական աջակցությամբ նախատեսվում է ընդլայնել արտերկրում հայագիտական կենտրոնների ցանկը, ինչպես նաև անցկացնել հայագիտական կենտրոնների կոնֆերանս:

Հանդիպման ընթացքում ներկաները նախարար Ժաննա Անդրեասյանին են ուղղել իրենց հուզող հարցերը, որոնք վերաբերել են դասագրքերի առավելագույն հասանելիության ապահովմանը, համաժողովների մասին իրազեկվածության բարձրացմանը, սփյուռքի համայնքների հետ համագործակցության, համատեղ ցուցադրությունների կազմակերպման հնարավորություններին, սփյուռքում հայկական մշակույթի հանրահռչակման գործիքակազմերին, Հայաստանում կրթական հաստատությունների քաղաքաշինական անվտանգության ապահովմանը, երիտասարդ դեսպանների ներուժի իրացմանը թե՛ Հայաստանի, թե՛ սփյուռքի կրթամշակութային կյանքի զարգացման գործընթացում և այլն:

Նյութի աղբյուրը. ՀՀ կրթության, գիտության, մշակույթի և սպորտի նախարարություն