«ՀՀ վարչապետի գավաթ» խճուղային հեծանվավազքի մրցաշարն առաջին անգամ անցկացվել է դպրոցականների համար

Սեպտեմբերի 30, 2024

Սպորտային լուրեր

Գեղարքունիքի մարզի «Արևիկ» հանգստյան գոտուց մինչև Շողակաթ համայնքն ընկած ճանապարհահատվածում՝ շուրջ 20 կմ մրցատարածությունում այսօր 66 դպրոցականներ մասնակցել են «ՀՀ վարչապետի գավաթ» խճուղային հեծանվավազքի սիրողական մրցաշարին:

Մրցաշարին հետևել են ՀՀ վարչապետ Նիկոլ Փաշինյանը, վարչապետի տիկին Աննա Հակոբյանը, ԿԳՄՍ նախարար Ժաննա Անդրեասյանը, Առողջապահության նախարար Անահիտ Ավանեսյանը, ԿԳՄՍ նախարարի տեղակալ Կարեն Գիլոյանը,Գեղարքունիքի մարզպետ Կարեն Սարգսյանը:

Նիկոլ Փաշինյանը մասնակցել է նաև հեծանվավազքին՝ մասնակից աշակերտներին հեծանիվով ուղեկցելով մեկնարկից մինչև եզրագիծ: Մրցաշարն անցկացվել է ՀՀ հանրակրթական ուսումնական հաստատությունների 10-12-րդ դասարանների աշակերտներից կազմված հավաքական թիմերի միջև:

1-ին տեղը զբաղեցրել է Կոտայքի մարզի Աբովյանի թիվ 4 ավագ դպրոցի թիմը, 2-րդ տեղը՝ Կոտայքի մարզի Կապուտանի միջնակարգ դպրոցը, իսկ 3-րդ տեղը գրավել է Արարատի մարզի Ուրցաձորի միջնակարգ դպրոցը։

Եզրափակիչ փուլին 1-ին, 2-րդ և 3-րդ տեղեր գրաված դպրոցների թիմերը և մասնակիցները պարգևատրվել են ԿԳՄՍՆ համապատասխան կարգի հավաստագրերով, գավաթով, մեդալներով և դրամական պարգևներով: 1-ին տեղ գրաված դպրոցը պարգևատրվել է 4․000․000 ՀՀ դրամով, 2-րդ տեղը՝ 2․500․000 ՀՀ դրամով, 3-րդ տեղը՝ 1․500․000 ՀՀ դրամով:

Պարգևատրվել են նաև դպրոցների ֆիզկուլտուրայի ուսուցիչները․ 1-ին տեղ՝ 700․000 ՀՀ դրամ, 2-րդ տեղ՝ 500․000 ՀՀ դրամ և 3-րդ տեղ՝ 300․000 ՀՀ դրամ: Հեծանվավազքի հաղթող թիմերի աշակերտները ևս պարգևատրվել են դրամական մրցանակներով. 1-ին տեղ՝ 2 մասնակից՝ 150․000-ական ՀՀ դրամ, 2-րդ տեղ՝ 2 մասնակից՝ 100․000-ական ՀՀ դրամ, 3-րդ տեղ՝ 2 մասնակից՝ 75․000-ական ՀՀ դրամ։

Հաղթողներին պարգևատրել է ՀՀ վարչապետ Նիկոլ Փաշինյանը։

Շնորհավորելով մրցաշարի հաղթողներին և բոլոր մասնակիցներին՝ Վարչապետը նշել է, որ միջոցառման նպատակը առողջ ապրելակերպի խրախուսումն է․ «Ուզում ենք բոլոր հնարավոր ձևերով առողջ ապրելակերպը քարոզել, դրան զուգահեռ նաև քարոզել թիմային պայքարի տրամաբանությունը: Դպրոցականների շրջանում «Վարչապետի գավաթ» ձևաչաձով անհատական մրցամարտ ենթադրող մրցաշարեր չունենք: Ե՛վ սեղանի թենիսը, և՛ խճուղային վազքը, և՛ հեծանվավազքը՝ բոլորը թիմային են»:

Մրցաշարի կազմակերպման և դպրոցականների կողմից նախապատրաստական աշխատանքների իրականացման նպատակով ուսումնական տարվա սկզբին ՀՀ մարզերի և Երևան քաղաքի հանրակրթական ուումնական հաստատություններին տրամադրվել են հեծանիվներ։

«Այս ծրագրի համար 6500 հեծանիվ ենք ձեռք բերել, որոնց մի մասն արդեն բաժանվել է դպրոցներին։ Մյուս մասը ևս շուտով կլինի Հայաստանում և համապատասխանաբար կբաժանվի դպրոցներին»,- ասել է ԿԳՄՍ նախարարի տեղակալ Կարեն Գիլոյանը և տեղեկացրել, որ հաջորդ մրցաշարը կանցկացվի փոքր-ինչ փոփոխված ձևաչափով՝ ընդգրկելով ավելի մեծ թվով մասնակիցների։ Նա կոչ է արել հանրությանը ակտիվ լինել և մասնակցել նաև հոկտեմբերի 19-ին կայանալիք խճուղավազքի մրցաշարին։

«ՀՀ վարչապետի գավաթ» խճուղային հեծանվավազքի սիրողական մրցաշարի 1-ին փուլին մասնակցել են ՀՀ մարզերի և Երևան քաղաքի միջնակարգ, ավագ դպրոցների և վարժարանների թիմերը, իսկ 2-րդ՝ եզրափակիչ փուլին՝ 1-ին փուլում 1-3-րդ տեղերը գրաված հաստատությունների հավաքական թիմերը (թիմի կազմում՝ 1 տղա, 1 աղջիկ):

Նշենք, որ նախորդ տարիներին հեծանվավազքի սիրողական մրցաշարն անցկացվում էր կանանց և տղամարդկանց երկու տարիքային խմբերի համար։ «ՀՀ վարչապետի գավաթ» խորագիրը կրող սիրողական մրցաշարերի անցկացման կարգում կատարված փոփոխությամբ՝ այս տարվանից սկսած՝ խճուղային հեծանվավազքի և սեղանի թենիսի մրցաշարերն անցկացվում են միայն դպրոցականների համար: Իսկ «ՀՀ վարչապետի գավաթ» սիրողական խճուղավազքի մրցաշարին մասնակցող 3 տարիքային խմբերից մեկը 13-17 տարեկան դպրոցականներն են։

Նյութի աղբյուրը. ՀՀ կրթության, գիտության, մշակույթի և սպորտի նախարարություն