«Էթնոս» մանկապատանեկան կենտրոնը կազմակերպել էր «Հայկական մշակույթի գանձերը» խորագրով մրցույթ

Մայիսի 17, 2017

Սփյուռքի լրատու

Տյումենի  Մ. Մաշտոցի անվան  հայկական մշակույթի կենտրոնը  ստեղծագործական զարգացման և հումանիտար կրթության «Էթնոս» մանկապատանեկան կենտրոնի հետ համատեղ մայիսի 14- ին կազմակերպել էր  «Հայկական մշակույթի գանձերը » խորագրով ամենամյա քաղաքային  մրցույթը, նվիրված  հայազգի   մեծանուն ծովանկարիչ  Հովհաննես Այվազովսկու  200-ամյա հոբելյանին:  Միջոցառմանը ներկա էին «Էթնոս» մանկապատանեկան կենտրոնի տնօրեն Ալեքսանդր Գրադուսովը, «Հայկական մշակույթի կենտրոն» նախագծի հեղինակ և ղեկավար Սերգո Ստեփանյանը, « Հայաստան» հասարակական կազմակերպության  խորհրդի անդամ Արմենակ Խաչատրյանը, երիտասարդական կազմակերպության անդամ Էդգար ՈՒղուրյանը, տարբեր ազգությունների ներկայացուցիչներ, մանկավարժներ, ծնողներ: Մրցույթն իր մեջ ընդգրկում էր  երկու անվանակարգ՝  «Կերպարվեստ» և «Հայ մշակույթի գիտակ»: Ներկայացված էր մրցույթին մասնակցելու 45 հայտ: Առաջին անվանակարգում 7-10 տարեկան  երեխաները ներկայացրեցին նկարներ՝ «Հայկական հեքիաթներ» թեմայով:  Երկրորդ  անվանակարգում մրցույթն անցավ  երկու  փուլով՝  առաջին փուլի մասնակիցները՝  11-15  տարեկան աղջիկներ   և պատանիներ     ներկայացրեցին գրավոր աշխատանքներ՝ ռեֆերատներ   «Հայկական մշակույթի գանձերը» խորագրով: Երկրորդ փուլում  լավագույն գնահատականի արժանացած աշխատանքների 11  հեղինակները  ներկայացան  հանդիսատեսի և ժյուրիի գնահատանքին: Մրցույթի երկրորդ  փուլի  պայմաններն էին՝ ռեֆերատի պաշտպանություն ( ռուսերեն լեզվով), այցեքարտ, ասմունք, ներկայացնել հայկական կամ ընտանեկան որևէ ավանդույթ:  Ժյուրիի կազմում էին Ս.Ստեփանյանը, Արմենակ  Խաչատրյանը, հայոց լեզվի և գրականության ուսուցչուհիներ Սիլվա Սիմոնյանը և Ռուզաննա Դանիելյանը, Էդգար Ուղուրյանը:

Մասնակիցները լարված էին և հուզված, նրանցից  շատերը առաջին անգամ էին  հանդիսատեսին ներկայանալու  մայրենի լեզվով: Նրանք խոսում էին  մեր ոսկեղենիկ մայրենիով,  ասմունքում  ոգևորված   և կարոտով  պատմում  իրենց Հայրենիքի մասին, որտեղ  երբևիցե չեն եղել: Մայրիկների օգնությամբ ներկայացրեցին մեր հայկական ավանդույթներ ու սովորույթներ:  Մինչ ժյուրին ամփոփում էր մրցույթի արդյունքները,հանդիսատեսի ուշադրությանը ներկայացվեց մշակույթի կենտրոնի սաների ուժերով պատրաստված փոքրիկ  համերգային ծրագիր:  Անցկացվեց   նաև վիկտորինա «Այվազովսկու կյանքն ու գործունեությունը»  թեմայով: 

«Կերպարվեստ» անվանակարգում առաջին, երկրորդ և երրորդ աստիճանի դիպլոմներ և մրցանակներ հանձնեցին համապատասխանաբար Արթուր Հովեյանին, Արթուր Վարդանյանին և Դավիթ Պողոսյանին, իսկ մնացած բոլոր մասնակիցներին՝ պատվոգրեր մասնակցության համար և փոքրիկ մրցանակներ: «Հայ մշակույթի գիտակ» անվանակարգում  մրցանակային  առաջին կարգի դիպլոմ ստացավ Գոհար Վարդանյանը, երկրորդ մրցանակային տեղը բաժանեցին Արթուր Պողոսյանն ու  Հասմիկ Վարդանյանը, և երրորդ  կարգի դիպլոմ ստացավ Դիանա Ասատրյանը: Շնորհակալագրեր  հանձնեցին այն ծնողներին, ովքեր մշտապես համագործակցում են մշակույթի կենտրոնի մանկավարժական կոլեկտիվի հետ, աջակցում հայ երիտասարդ սերնդին հայեցի դաստիարակելու դժվարին,  պատասխանատու  հայապահպան  գործին: Հայոց լեզվի և գրականության ուսուցչուհի Ալվան Պողոսյանը ջանք ու եռանդ չէր խնայել մրցույթը բարձր մակարդակով կազմակերպելու, մասնակիցներին օգնելու անկեղծ և հուզիչ  ելույթներ պատրաստելու համար: «Ամենամյա այս մրցույթը ամբողջ տարվա ընթացքում  ձեռք բերած գիտելիքներն ամփոփելու լավագույն առիթն է: Մեր սաները մեծ ոգևորությամբ են սպասում ավանդույթ դարձած  տարեվերջյան այս միջոցառմանը», -  նշեց Ա. Պողոսյանը: Վերջում շնորհակալական խոսքով հանդես եկան ծնողնըրը, նշեցին, որ ուրախ ու հպարտ են իրենց երեխաներին տեսնելու որպես իսկական հայեր՝ ազգային ավանդույթներով,  մտածելակերպով  և հոգեկերտվածքով:

Մեր ազգի հոգևոր հարստությունն  անսահման է, և այն մեզ պետք է ներշնչի անսպառ ուժ, էներգիա մեր նպատակների իրականացման ճանապարհին, իսկ ամենակարևոր նպատակն է դաստիարակել հայրենասեր և աշխատասեր  երիտասարդ սերունդ: Միջոցառումը լուսաբանվեց  տեղական « Тюменское время» հեռուստաալիքով: