Ժաննա Անդրեասյանը պարգևատրել է բանակային խաղերի հաղթողներին

Հուլիսի 8, 2024

Սպորտային լուրեր

ՀՀ կրթության, գիտության, մշակույթի և սպորտի նախարար Ժաննա Անդրեասյանը Տավուշի մարզում ներկա է եղել բանակային խաղերի փակման հանդիսավոր արարողությանն ու հաղթողների պարգևատրմանը։

Նախարարը շնորհավորել է բանակային խաղերի մասնակիցներին՝ երկրորդ տարին անընդմեջ գրանցած արդյունքների առիթով: Ժաննա Անդրեասյանն ընդգծել է՝ մեկշաբաթյա մրցումները ցույց են տվել, թե ինչպես են հաստատակամությունը, պայքարի վճռականությունը և հետևողականությունն արդյունք տալիս:

«Մասնակցությունը խաղերին արդեն իսկ կարևոր է, քանի որ նմանօրինակ խաղերի միջոցով մեր ուժային և իրավապահ կառույցների ներկայացուցիչները ստանում են հնարավորություն ևս մեկ անգամ փորձարկելու մասնագիտական կարևոր հմտությունները, զարգացնելու և բարելավելու դրանք, ինչպես նաև հանդիպելու, շփվելու միմյանց հետ, ձեռք բերելու նոր ընկերներ: Սա յուրաքանչյուրի համար նաև պայքարի, մրցման և անհատական որակների բարելավման առիթ է»,- ասել է Ժաննա Անդրեասյանը:

ԿԳՄՍ նախարարը կարևորել է նաև մասնակիցների աշխատանքն ու ջանքը գնահատելու՝ ՀՀ կառավարության պատրաստակամությունը:

«Այս խաղերը նաև թիմային պայքարի և համագործակցության օրինակ են: Սա, առաջին հերթին, խոսում է ոգու, հաստատակամության և վճռականության մասին, ինչի համար շնորհակալություն եմ հայտնում բոլորիդ: Վստահ եմ՝ ձեր մասնակցությամբ և աշխատանքով օրինակ եք երիտասարդների համար»,- դիմելով մասնակիցներին` ասել է նախարարն ու փաստել՝ մրցակցող թիմերի քանակն ընդլայնվել է, որն ուրախալի է:

Նախարար Ժաննա Անդրեասյանը պարգևատրել է ընդհանուր թիմային հաշվարկով մրցանակային տեղեր զբաղեցած մասնակիցներին: Ուժային կառույցների միջև թիմային հաշվարկով առաջին հորիզոնականը զբաղեցրել է Պաշտպանության նախարարության 5-րդ թիմը, երկրորդ տեղը գրավել է ՊՆ 3-րդ, իսկ 3-րդ հորիզոնականը՝ ՀՀ պետական պահպանության ծառայության հավաքական թիմերը։

Իրավապահ մարմինների միջև ընդհանուր թիմային հաշվարկով առաջին տեղը զբաղեցրել է ՀՀ քննչական կոմիտեի թիմը, երկրորդ տեղը` ՀՀ արդարադատության նախարարության, իսկ երրորդ հորիզոնականը՝ Հակակոռուպցիոն կոմիտեի հավաքական թիմերը:

Բանակային խաղերի փակման հանդիսավոր արարողության շրջանակում կայացել է նաև կողմնորոշում, հրաձգություն «ԱԿ 103» ինքնաձիգից, հրաձգություն «ՊՄ» ատրճանակից, հրաձգություն «ԴԴՀ» հրացանից, բանակային քառամարտ, ռազմականացված կրոսավազք, ռազմականացված կրոսավազքի փոխանցումավազք մարզաձևերի իգական և արական սեռի մրցանակակիրների պարգևատրման արարողությունը:

Հիշեցնենք՝ ՀՀ վարչապետի հովանու ներքո ուժային կառույցների միջև երկրորդ անգամ անցկացված բանակային խաղերին մասնակցել են ՀՀ պաշտպանության, Ներքին գործերի, Արդարադատության նախարարությունների, Ազգային անվտանգության ծառայության, Պետական եկամուտների, Քննչական, Հակակոռուպցիոն կոմիտեների, Դատախազության և Պետական պահպանության ծառայության հավաքական թիմերը, որոնցում ներգրավված են եղել կին ծառայողներ: Ընդհանուր առմամբ՝ խաղերին մասնակցել է 18 թիմ:

Ռազմականացված քառամարտ, ռազմականացված կրոսավազք, կողմնորոշում, հրաձգություն «ԱԿ 103» ինքնաձիգից, հրաձգություն «ՊՄ» ատրճանակից, հրաձգություն «ԴԴՀ» հրացանից մրցաձևերում ընդհանուր հաշվարկով 1-ին, 2-րդ և 3-րդ տեղերը գրաված մասնակիցները (տղամարդիկ և կանայք) կպարգևատրվեն համապատասխան կարգի հավաստագրերով, մեդալներով և դրամական պարգևավճարով` 1-ին տեղ՝ 1 000 000 դրամ, 2-րդ տեղ՝ 500 000 դրամ, 3-րդ տեղ՝ 300 000 դրամ, 1-ին տեղ գրաված թիմը՝ գավաթով:

Ռազմականացված կրոսավազքի փոխանցումավազքի մրցանակակիր թիմի անդամները կպարգևատրվեն մեդալներով, պատվոգրերով և դրամական պարգևավճարով` 1-ին տեղ՝ 300 000 դրամ, 2-րդ տեղ՝ 200 000 դրամ, 3-րդ տեղ՝ 150 000 դրամ:

Իրավապահ մարմինների միջև թիմային հաշվարկի արդյունքում մրցանակային տեղեր գրաված թիմերը կպարգևատրվեն համապատասխան կարգի հավաստագրերով և գավաթով:

Նյութի աղբյուրը. ՀՀ կրթության, գիտության, մշակույթի և սպորտի նախարարություն