Հոբելյանական միջոցառում Գյումրիում

Սեպտեմբերի 28, 2016

Պաշտոնական

ՀՀ կրթության և գիտության նախարարության Գյումրու «Ընտանիք» մանկապատանեկան ստեղծագործական կենտրոնում տեղի է ունեցել Հայաստանի Հանրապետության անկախության 25-ամյակին, Լեռնային Ղարաբաղի Հանրապետության հռչակման և «Ընտանիք» կենտրոնի հոբելյանական տարեդարձերին նվիրված տոնակատարություն: Միջոցառմանը ներկա են գտնվել կենտրոնի կայացման պատմության մեջ իրենց ավանդն ունեցած հայ և օտարազգի բարերարներ՝ Ֆրանսիայի Ազգային ժողովի պատգամավոր,

Ֆրանսիա-Հայաստան պատգամավորական բարեկամության խմբի նախկին նախագահ, «Ֆրանսիա-Ղարաբաղ» բարեկամության շրջանակի նախագահ Ֆրանսուա Ռոշբլուանը, խորհրդարանական խորհրդատու-օգնական, Ֆրանսիայի Սեն Շամոն քաղաքային խորհրդի անդամ Էմանուել Մանդոնը, SPFA ֆրանսիական կազմակերպության Արցախում և Հայաստանում շինարարական ծրագրերի պատասխանատու Ժակ Մաթոսյանը, ՀՀ Գերագույն խորհրդի առաջին գումարման պատգամավոր, «Հայուրալսիբշին» նախագծային-շինարարական միավորման պետ, հետաղետյալ Գյումրի քաղաքի շինարարական աշխատանքների համակարգող Լ. Պոլոնսկին, Ազգային ժողովի պատգամավոր Ս. Ավետիսյանը, ԿԳ նախարարի խորհրդական Ա. Աղբալյանը, ԿԳՆ մարզառազմական և արտաուսումնական դաստիարակության վարչության պետ Ա. Պետրոսյանը, Գյումրու քաղաքապետ Ս. Բալասանյանը, մարզային իշխանությունների, համագործակցող կազմակերպությունների, կրթամշակութային ոլորտի ներկայացուցիչներ, մանկավարժներ, ծնողներ և սաներ:

ԿԳ նախարարի խորհրդական Արտակ Աղբալյանն ընթերցել է նախարար Լևոն Մկրտչյանի ուղերձը՝ միջոցառման մասնակիցներին: Կրթության և գիտության ոլորտում ներդրած մեծագույն ավանդի համար կենտրոնի տնօրեն Արթուր Մինասյանը, բարերարներ Ժակ Մաթոսյանը և Ֆրանսիայի Ազգային ժողովի պատգամավոր Ֆրանսուա Ռոշբլուանը պարգևատրվել են ՀՀ կրթության և գիտության նախարարության բարձրագույն պարգևով՝ «Ոսկե հուշամեդալով», իսկ ֆրանսիացի բարերար Էմանուել Մանդոնը և «Սեդրիկ Մարտեն» հիմնադրամի նախագահ Ժակ Մարտենը՝ ՀՀ կրթության և գիտության նախարարության պատվոգրով:

Նկարչական և կիրառական արվեստի մանկապատանեկան միջազգային մրցույթների մասնակից և առաջին մրցանակային տեղ գրաված կենտրոնի 11 սանի հանձնվել են դիպլոմներ:

Մեծարվել են նաև նույն հարկի տակ գործող Գյումրու թիվ 4 արհեստագործական պետական ուսումնարանի շրջանավարտներ, ապրիլյան քառօրյա պատերազմի մասնակից, «Մարտական խաչ» 2-րդ աստիճանի շքանշանակիր Ռաֆայել Հովհաննիսյանը, «Տանկային երկամարտ-2014» միջազգային մրցույթի փոխչեմպիոն, «Մարշալ Բաղրամյան» շքանշանակիր Սանասար Ծառուկյանը, «Մարշալ Բաղրամյան» շքանշանակիր Արտյոմ Մուրադյանը, «Դրաստամատ Կանայան» շքանշանակիր Վառլամ Սիմոնյանը, «Անդրանիկ Օզանյան» շքանշանակիր Ռազմիկ Հովհաննիսյանը, «Վազգեն Սարգսյան» շքանշանակիր Էդգար Մկրտչյանը:

Նշենք, որ 1991 թվականին հիմնադրված «Ընտանիք» կենտրոնը հետաղետյալ Գյումրի քաղաքում առաջիններից էր, որ զբաղվել է դեռահասների հիմնախնդիրների լուծմանը:

Նյութի աղբյուրը. ՀՀ կրթության և գիտության նախարարության կայք