Հայաստանի բասկետբոլի ազգային հավաքականը Երևանում հաղթել է Ալբանիային

Փետրվարի 26, 2024

Սպորտային լուրեր

Հայաստանի բասկետբոլի ազգային հավաքականն աշխարհի 2027 թվականի առաջնության նախընտրական առաջին փուլի երկրորդ խաղում սեփական հարկի տակ տակ ընդունել է Ալբանիայի ընտրանուն և 84:79 հաշվով տպավորիչ հաղթանակ տարել:

Կարեն Դեմիրճյանի անվան մարզահամերգային համալիրում կայացած հանդիպման ամենաարդյունավետ բասկետբոլիստն Անդրե Սպայթ Մկչտչյանն էր (Հայաստան)՝ վաստակած 31 միավորով. նա նաև 6 անգամ տիրել է օղակից անդրադարձող գնդակին և կատարել է 4 արդյունավետ փոխանցում:

29-ամյա բասկետբոլիստը լրագրողների հետ զրույցում նշել է՝ հայրենիքում հաղթանակի հասնելն առանձնակի կարևոր է իր համար. «Մենք պարտավոր էինք հաղթելու միավորների առավել մեծ տարբերությամբ: Երբեք չեմ սիրում պարտվել Հայաստանում, և հիմա ուրախ եմ այս հաղթանակի համար: Ալբանիան շատ լավ խաղ էր ցուցադրում: Շատ մեծ ճնշում էին գործադրում ինձ և Քրիս Ջոնսի վրա: Հստակ գիտեին, թե ինչ պետք է անեն պաշտպանվելիս: Այդուհանդերձ, շատ ուրախ եմ, որ կարողացանք հաղթել: Այս ամենը Հայաստանի ու մեր հիանալի երկրպագուների համար է, որնք այսօր ֆանտաստիկ էին»:

Հայաստանի հավաքականի կազմում տպավորիչ խաղով աչքի է ընկել նաև 34-ամյա Զարեհ Զարգարյանը: Նրա խոսքով՝ ազգային թիմի մարզաշապիկը կրելը մեծ պատիվ է:

«Ի տարբերություն Ալբանիայի ընտրանու, որը հասցրել էր մեզ ուսումնասիրել անցած շաբաթ Ավստրիայի հետ խաղում, մենք այդ հնարավորությունը չէինք ունեցել: Մեզ համար ամեն ինչ նոր էր նրանց կատարմամբ: Կարևորը՝ միասնական էինք ու ցույց տվեցինք այն, ինչ պետք էր: Դաշտի երկու ամենալավ խաղացողները՝ Քրիս Ջոնսն ու Անդրե Սպայթ Մկրտչյանը, մեր թիմում էին. Սա մեծ առավելություն էր: Ինչ վերաբերում է Հայաստանի հավաքականին՝ շատ էի կարոտել: Սա իմ հայրենիքն է. երբ էլ ինձ կանչեն՝ կգամ: Ճիշտ է՝ արդեն տարիքով եմ, բայց երբ հագնում եմ այս մարզաշապիկը, մեծ հպարտություն եմ զգում: Շնորհակալ եմ բոլոր երկրպագուներին հիանալի աջակցության համար: Մեզ շատ էին օգնում»,- ասել է Զարգարյանը, որը 2016 թվականից հետո առաջին անգամ էր միացել թիմին:

Հիշեցնենք՝ ԱԱ-2027-ի նախընտրական առաջին փուլի մեկնարկային խաղում Հայաստանի հավաքականն օրեր առաջ Վիեննայում մրցել էր Ավստրիայի հավաքականի հետ և պարտվել 91:106 հաշվով:

Մեր ընտրանին հաջորդ հանդիպումը կանցկացնի նոյեմբերի 24-ին՝ Երևանում հյուրընկալելով Ավստրիային: Անցկացրած երկու խաղերից հետո Հայաստանի հավաքականը 3 միավորով գլխավորում է C ենթախմբի մրցաշարային աղյուսակը: Ավստրիան ու Ալբանիան մեկական խաղերից հետո զբաղեցնում են երկրորդ և երրորդ տեղերը՝ համապաստախանաբար 2 և 1 միավորներով:

Աշխարհի առաջնության նախընտրական փուլին մասնակցում են 10 հավաքականներ, որոնք ընդգրկված են 3 ենթախմբերում: Հաջորդ փուլի ուղեգիր կնվաճեն ենթախմբերում առաջին հորիզոնականը զբաղեցրած թիմերը և երկրորդ հորիզոնականում հայտնված լավագույն արդյունքով հավաքականը:

Նյութի աղբյուրը. ՀՀ կրթության, գիտության, մշակույթի և սպորտի նախարարություն