Հրաժեշտ  այբբենարանին

Ապրիլի 27, 2017

Դպրոցական անցուդարձ

«Լեզուն  է  ամեն  մի  ժողովրդի ազգային գոյության և էության ամենախոշոր փաստը, ինքնուրույնության ու հանճարի ամենախոշոր դրոշմը, պատմության ու հեռավոր անցյալի կախարդական բանալին,հոգեկան կարողությունների ամենաճոխ գանձարանը,հոգին ու հոգեբանությունը»,- այսպես բարձր է գնահատել մեր ոսկեղենիկ լեզուն մեծն Թումանյանը: Պատահական չէ, որ յուրաքանչյուր սերունդ, երբ բացում է դպրության  դռները, նախևառաջ  պարտավորվում է սովորել հայոց այբուբենը, որից սկիզբ է առնում և  ծավալվում  ողջ գիտությունը: Թոթովախոս մանուկների համար ամենամեծ հարստությունն ու ամենաշքեղ գանձարանը լեզվի իմացությունն է: Դա էին եկել ապացուցելու Հրազդանի հ.7 միջնակարգ դպրոցի առաջին դասարանցիները: Նրանք հպարտորեն հնչեցրին հայոց այբուբենը և ևս մեկ անգամ հաստատեցին, որ, իրոք, մեր չափազանց հարուստ ու ճոխ  հայոց լեզուն  հայ ժողովրդի հեռավոր անցյալի բանալին է և մեր լինելիության,մեր գոյատևման կարևոր հենասյուներից մեկը:

«Հրաժեշտ  այբբենարանին» խորագիրը կրող  միջոցառման կազմակերպիչներն էին դասվար Սիլվա Կարապետյանն ու երաժշտության ուսուցչուհի Գայանե Դանիելյանը: Տոնական տրամադրություն էր տիրում: Հասկանալի էր երեխաների ոգևորությունը, նրանք արդեն  գրաճանաչ էին, մեսրոպյան այբուբենը նրանցից յուրաքանչյուրի ձեռքբերումն էր: Ոչ պակաս ոգևորված էին նաև ծնողներն ու հանդիսատեսը, ովքեր  հաճելի պահեր ապրեցին՝ վայելելով առաջին դասարանցիների և նրանց ավագ ընկերների բազմազան  ու բազմաբովանդակ կատարումները՝ ասմունքից մինչև հեքիաթային հերոսների կերպարավորումներ՝ համեմված գեղեցիկ  երգ ու պարով: Պատահական չէր նաև  առաջնակարգ սրբերի շարքը դասված մեր մեծագույն հայի՝ Մեսրոպ Մաշտոցի կերպարի ներկայությունը, ում տրված էր   հայոց այբուբենը  ստեղծելու վեհ առաքելությունը: Այո՛, հայոց լեզուն չէր կարող հարատևել և զարգանալ,եթե գոյություն չունենային հայոց գրերը՝ մեր ազգապահպան 36 զինվորները, որոնք ստիպեցին օտարներին  զգալ և հասկանալ,թե ի˜նչ սքանչելի ու ստեղծագործ  ժողովուրդ ենք մենք, և ի˜նչ  հզոր հայրենիք ունենք: Իսկ   այսօրվա  տառաճանաչ դարձած մանուկները վաղվա մեր հայրենիքը կերտողն ու շենացնողն են, հարկ եղած դեպքում՝ անառիկ լեռների պես պաշտպան կանգնող  զինվորներն են: 

Միջոցառման ավարտին դպրոցի տնօրեն  Հ. Ասատրյանը հույս հայտնեց, որ առաջին դասարանի աշակերտները  հավատարիմ կմնան իրենց երդմանը և սրբորեն կպահպանեն ու հետագա սերունդներին կփոխանցեն մեր ազգի   ամենամեծ գանձը՝ հայոց մեսրոպատառ այբուբենը, և մայրենիի յուրաքանչյուր դաս կսկսեն հայոց այբուբենն արտասանելով:  

Արմինե Ալեքսանյան
Հրազդանի հ.7 միջնակարգ  դպրոցի  հումանիտար մասնախմբի նախագահ՝