Ապրիլի 15-16-ը Ուզբեկստանի Հանրապետության Տաշքենդ քաղաքում, որը հռչակվել է 2024 թվականի ԱՊՀ երիտասարդական մայրաքաղաք, տեղի է ունեցել ԱՊՀ մասնակից պետությունների երիտասարդության հարցերով խորհրդի հերթական նիստը, որին մասնակցել է նաև ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանի գլխավորած պատվիրակությունը:
Նիստին մասնակցում էին Ռուսաստանի, Ուզբեկստանի, Ղրղըզստանի, Տաջիկստանի, Ղազախստանի, Բելառուսի, Ադրբեջանի, ԱՊՀ գործադիր կոմիտեի, ԱՊՀ մասնակից պետությունների երիտասարդների հետ աշխատանքի և երիտասարդական ձեռներեցության զարգացման հենակետային կազմակերպությունների ներկայացուցիչները։
Խորհրդի անդամները քննարկել են Ուզբեկստանի Հանրապետության պետական երիտասարդական քաղաքականությանն ուղղված հարցեր, ԱՊՀ միջազգային երիտասարդական քաղաքականության ռազմավարության 2023-2024 թթ. գործողությունների ծրագիրը, ԱՊՀ մասնակից պետություններում «2024 թվականը՝ ԱՊՀ կամավորական տարի» ծրագրի շրջանակում նախատեսված միջոցառումները։
Նիստի ընթացքում քննարկվել են նաև «ԱՊՀ երիտասարդական մայրաքաղաք» ծրագրին առնչվող հարցեր, մասնավորապես՝ ԱՊՀ երիտասարդական մայրաքաղաքներում իրականացվող միջոցառումները։ Այս համատեքստում անդրադարձ է եղել նաև 2026 թվականին ԱՊՀ երիտասարդական մայրաքաղաք հռչակված ՀՀ Սյունիքի մարզկենտրոն Կապանում նախատեսվող միջոցառումներին։ Նիստի ընթացքում ընդունվել են նաև մի շարք որոշումներ. հաստատվել է, որ հաջորդ նիստը տեղի կունենա Տաջիկստանի Հանրապետության Դուշանբե քաղաքում։
ԿԳՄՍ նախարարի տեղակալ Արթուր Մարտիրոսյանն ԱՊՀ երիտասարդության հարցերով խորհրդի նիստում ներկայացրել է Հայաստանի Հանրապետությունում երիտասարդության ոլորտի բարեփոխումները, որոնք ընդգրկում են օրենսդրական մշակումների, ինչպես նաև ենթակառուցվածքների և միջավայրի բարելավման աշխատանքներ՝ միտված երիտասարդների ներուժի բացահայտմանը և հնարավորությունների ընդլայնմանը։ Փոխնախարարը, մասնավորապես, ներկայացրել է «Երիտասարդական քաղաքականության մասին» օրենքի մշակման ուղղությամբ տարվող աշխատանքները, ինչպես նաև նշել, որ կառույցների զարգացման շատ ծրագրեր հասանելի են դարձել երիտասարդական պորտալի և այլ ռեսուրսների միջոցով ինչպես ՀՀ երիտասարդներին, այնպես էլ Հայաստանից դուրս բնակվող թե՛ հայ, թե՛ օտարերկրյա երիտասարդներին։
Արթուր Մարտիրոսյանն անդրադարձել է նաև Հայաստանի Հանրապետությունում իրականացվող մի շարք երիտասարդական միջոցառումների և ծրագրերի՝ ընդգծելով, մասնավորապես, մեդիագրագիտության, կիբեռգրագիտության, ֆինանսական գրագիտության և կամավորության խթանմանն ուղղված ծրագրերը, որոնց 2024 թվականին մասնակցության հնարավորություն ունեն նաև ԱՊՀ մասնակից պետությունների երիտասարդները։
Խորհրդի անդամները մասնակցել են Տաշքենդի՝ որպես ԱՊՀ առաջին երիտասարդական մայրաքաղաքի հռչակման բացման արարողությանը, հանդիպել ԱՊՀ մասնակից պետությունների երիտասարդական հասարակական կազմակերպությունների համաժողովի մասնակիցների հետ, ծանոթացել Տաշքենդում գործող մի շարք երիտասարդական կառույցների գործունեությանը։
Հիշեցնենք, որ ԱՊՀ մասնակից պետությունների երիտասարդության հարցերով խորհուրդը ստեղծվել է 2005 թվականի նոյեմբերի 25-ին՝ համաձայն ԱՊՀ մասնակից պետությունների երիտասարդների հետ աշխատանքի բնագավառում համագործակցության համաձայնագրի։ Ներկայում խորհրդին անդամակցում են Հայաստանը, Ռուսաստանը, Տաջիկստանը, Բելառուսը, Ուզբեկստանը, Ղրղըզստանը, Ղազախստանը և Ադրբեջանը:
Ազգային գրադարանային շաբաթվա միջոցառումների շրջանակում ապրիլի 19-ին Հայաստանի ազգային գրադարանում առաջին անգամ կանցկացվի «Ընթերցանության մարաթոն»՝ նվիրված Ակսել Բակունցի ծննդյան 125-ամյակին։
Մասնակիցներն իրար հաջորդելով և 5-ական րոպե հերթական հատվածը կարդալով՝ կշարունակեն Բակունցի «Կյորես» վեպի ընթերցումը մինչև ավարտը: Մարաթոնի ընթացքում կընթերցվեն նաև մի շարք այլ պատմվածքներ՝ «Միրհավը», «Ալպիական մանուշակը», «Խոնարհ աղջիկը», «Սպիտակ ձին» և այլն։
Ընթերցանության մարաթոնին մասնակցելու համար արդեն իսկ գրանցվել են ավելի քան 20 մարզային, քաղաքային և համայնքային գրադարան, տասնյակ ընթերցողներ, դպրոցականներ, ուսուցիչներ, գրադարանավարներ և Բակունցի տաղանդի երկրպագուներ:
Մարաթոնի ամբողջ ընթացքը կհեռարձակվի առցանց: Միջոցառման մեկնարկը՝ ժամը 10:00:
Գրանցումները շարունակվում են։ Մասնացության համար անհրաժեշտ է հաղորդագրություն ուղարկել Ազգային գրադարանի ֆեյսբուքյան էջին։
ՀՀ կրթության, գիտության, մշակույթի և սպորտի նախարարությունը հանրային քննարկման է ներկայացրել «Հայաստանի տաղանդների զարգացման հիմնադրամ» ստեղծելու, «Տաղանդների զարգացման ծրագրի» հայեցակարգը և հիմնադրամի կանոնադրությունը հաստատելու մասին» ՀՀ կառավարության որոշման նախագիծը։
Նախագծով առաջարկվում է ստեղծել Տաղանդների զարգացման հիմնադրամ, որի աշխատանքները միտված են լինելու ՀՀ ամբողջ տարածքում մարդկային տաղանդի հայտնաբերմանն ու այդ տաղանդի դրսևորմանն աջակցելուն՝ ընդհուպ իր տաղանդի առավելագույն դրսևորմամբ հավելյալ արժեք ստեղծող, ինքնուրույն և մրցունակ անհատականությունների ու թիմերի կայացումը:
Հիմնադրամը պետք է իրականացնի իրավիճակի վերլուծություն, առանձնացնի թիրախային խմբերը, յուրաքանչյուր թիրախային խմբի համար մշակի տաղանդի հայտնաբերման գործուն մեխանիզմներ և աջակցության մեթոդաբանություն՝ առանցքում պահելով ինքնուրույն և մրցունակ անհատի կամ թիմերի ձևավորումը:
Աջակցությունը կարող է տրամադրվել անհատույց՝ կրթաթոշակի, նյութական աջակցության տեսքով, անտոկոս փոխառության տրամադրմամբ կամ կազմակերպություններում ներդրումների միջոցով:
Համաձայն հիմնավորման՝ ՀՀ-ում տաղանդի զարգացումը ներկայում հիմնականում տեղի է ունենում սեփական նախաձեռնությամբ և հնարավորությունների սահմաններում: Բացի այդ՝ ներկայում չկան անհրաժեշտ ինստիտուցիոնալ համակարգեր, որոնք հնարավորություն կընձեռեն վաղ տարիքից անհատի հակումներին և տաղանդի բացահայտմանը ու դրա դրսևորմանը և առաջխաղացմանը մասնագիտորեն աջակցելուն: Հատկապես գյուղական համայնքներում կամ սահմանամերձ բնակավայրերում տաղանդների դրսևորումը և զարգացումը կարող են ստորադասվել առօրյա գործունեությանը, և վաղ տարիքից ցածր արդյունարարությամբ աշխատանքի անցնելը էապես խոչնդոտում է որոշ դեպքերում անգամ բազային կրթություն ստանալուն:
Որոշ դեպքերում ընտանիքի սոցիալական վիճակից ելնելով՝ հնարավոր է, որ անհատի որոշակի առանձնահատուկ ունակություններն անտեսվեն և չստանան համապատասխան իրացում: Տաղանդների անտեսումը հնարավոր է նաև այն պայմաններում, երբ ոչ բոլոր բնակավայրերում են առկա տարբեր նախասիրությունների զարգացման համար անհրաժեշտ ծառայություններ, ինչպես, օրինակ, արվեստի կամ մարզական խմբակներ, որոնք հնարավորություն են տալիս նկատել երեխաների մոտ այս կամ այն տաղանդի դրսևորումը։
Ստեղծվող կառույցն ունենալու է գործունեության լայն դաշտ՝ առաջնային նպատակ ունենալով խրախուսել ստեղծագործ ներուժի բացահայտումը և զարգացումը:
Նախագծի վերաբերյալ առաջարկությունները կարելի է ներկայացնել մինչև 2024 թ. մայիսի 1-ը ներառյալ Իրավական ակտերի նախագծերի հրապարակման միասնական կայքում՝ հետևյալ հղումով՝ https://www.e-draft.am/projects/7127 :
Հուշարձանների և տեսարժան վայրերի միջազգային օրվան ընդառաջ՝ Մամուլի ազգային ակումբում տեղի է ունեցել ասուլիս՝ «Հայաստանի և Արցախի պատմության և մշակույթի հուշարձանների պահպանության խոչընդոտները և հնարավորությունները» թեմայով:
Ասուլիսի բանախոսներն էին՝ ԿԳՄՍ նախարարության պատմության և մշակույթի հուշարձանների պահպանության վարչության պետ Հարություն Վանյանը, «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Արմեն Հովհաննիսյանը և «Պատմամշակութային ժառանգության գիտահետազոտական կենտրոն» ՊՈԱԿ-ի տնօրեն Խաչիկ Հարությունյանը:
Հուշարձանապահպանությունը՝ առաջնահերթություն
Պատմության և մշակույթի հուշարձանների պահպանության վարչության պետ Հարություն Վանյանի տեղեկացմամբ՝ Հայաստանում հուշարձանների պետական ցուցակը կազմվում է ՀՀ կառավարության որոշումներով՝ յուրաքանչյուր մարզի և Երևանի համար առանձին. դրանք ընդհանուր առմամբ 25000 են՝ ներառյալ նորահայտ հուշարձանները:
Հուշարձաններին հատկացվող ֆինանսական միջոցները տարեցտարի ավելացվում են, և ըստ այդմ՝ բազմապատկվում են հուշարձանների թե՛ ուսումնասիրման, թե՛ պահպանության, թե՛ վերականգնման ու ամրակայման աշխատանքները: «Այս ոլորտում բյուջեն վերջին տարիների համեմատ մոտ 6 անգամ աճել է՝ կազմելով 1 մլրդ 150 մլն դրամ: Ուշադրության կենտրոնում են ոչ միայն կրոնական, այլև պետական, հասարակական, պաշտպանական կարևորության հուշարձաններ»,- ասել է Հարություն Վանյանը՝ նշելով, որ որոշ հուշարձանների ամրակայման և վերականգնման մրցույթներ արդեն կայացել են, որոշ դեպքերում էլ պարզապես դիմող շինկազմակերպություններ չեն լինում, ինչը մտահոգիչ խնդիր է:
Իրազեկման կարևորության մասին
«Պատմամշակութային ժառանգության գիտահետազոտական կենտրոն» ՊՈԱԿ-ի տնօրեն Խաչիկ Հարությունյանի խոսքով՝ հուշարձանների ուսումնասիրման, վկայագրման, պահպանական գոտիների կազմման և միջազգային ասպարեզում հանրահռչակման առումով նախորդ տարի իրականացվել է բավականին արդյունավետ աշխատանք, որն այս տարի կլինի շարունակական: Հուշարձանների պահպանման գործում նա կարևորել է հանրության իրազեկվածության և քաղաքացիների իրավագիտակցության բարձրացումը նաև ոչ ֆորմալ կրթական գործիքների միջոցով:
Հուշարձանների և տեսարժան վայրերի միջազգային օրը կնշվի մի շարք միջոցառումներով
«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Արմեն Հովհաննիսյանի տեղեկացմամբ՝ Հուշարձանների և տեսարժան վայրերի միջազգային օրվա առիթով 2023 թվականին անցկացվել է 190 միջոցառում՝ կրթական ծրագրեր, մաքրման աշխատանքներ, սեմինարներ ու բաց դասեր: Դրանց թիվն այս տարի կավելանա:
Հարությունն Վանյանն էլ իրազեկել է, որ օրվա շրջանակում Գեղարքունիքի մարզի «Բերդկունք» («Սպիտակ բերդ») ամրոցում ՀՀ ԿԳՄՍ նախարար Ժաննա Անդրեասյանը և Եվրոպական միության պատվիրակության ղեկավար Վասիլիս Մարագոսը կպարգևատրեն «Եվրոպական ժառանգության օրեր» ծրագրի «Եվրոպական ժառանգության երիտասարդ կերտողներ» մրցույթի մասնակիցներին:
Մրցույթն ուղղված է պատմամշակութային ժառանգության հանրահռչակմանը. այն ԿԳՄՍ նախարարության համակարգմամբ իրականացրել է Ե․ Չարենցի անվան գրականության և արվեստի թանգարանը:
«Մրցույթն իրականացվել է «Եվրոպական ժառանգության երիտասարդ կերտողներ» համաեվրոպական հարթակի համատեքստում՝ «Եվրոպական ժառանգության օրեր» ծրագրի շրջանակում։ Հայաստանը մրցույթին ներկայացել է 11-17 տարիքային խմբում։ Մրցույթում ներկայացվել է 41 աշխատանք. պատանեկան խմբերն ու անհատները մրցել են ազգային ժառանգության մասին իրենց պատկերացումներով՝ ներկայացնելով տեսասահիկներ, կոմիքսներ, անիմացիոն սյուժեներ, նկարչական աշխատանքներ, մինչև 5 րոպե տևողությամբ տեսանյութեր։ Ներկայացված աշխատանքներից 6-ն ընդգրկվել է եզրափակիչ փուլում»,-ասել է Հարություն Վանյանը՝ նշելով, որ այն հուշարձանները թե՛ տեղական, թե՛ միջազգային մակարդակում հանրահռչակելու լավ հարթակ է:
ՅՈՒՆԵՍԿՕ-ի համաշխարհային ցանկում նոր հուշարձաններ ընդգրկելու մասին
ՅՈՒՆԵՍԿՕ-ի համաշխարհային ցանկում ընդգրկված են երեք հուշարձանախմբեր՝ Սանահինի և Հաղպատի վանական համալիրները, Գեղարդի վանքը և Ազատ գետի հովիտը, Էջմիածինը՝ իր եկեղեցիներով և Զվարթնոցի տաճարը:
Նախնական ցանկում 4 հուշարձանախումբ են՝ Դվին հնավայրը, Նորավանքն ու Ամաղուի ձորահովիտը, Երերույքի տաճարը, Տաթև վանական համալիրն ու Տաթևի անապատը։ Նրա տեղեկացմամբ՝ Տիրինկատար լեռան վրա գտնվող վիշապաքարերը ՅՈՒՆԵՍԿՕ-ի Համաշխարհային ժառանգության նախնական ցանկում ընդգրկելու նպատակով պատրաստվում է հայտ՝ որպես Հայկական լեռնաշխարհին բնորոշ բացառիկ մշակութային երևույթ, որն այլ տեղ չի հանդիպում:
Ընթացակարգը ներկայացնելիս Խաչիկ Հարությունյանն ասել է, որ ՅՈՒՆԵՍԿՕ-ի ցանկում ընդգրկելու չափանիշներն այս տարիների ընթացքում ընդլայնվել են և խստացվել: Պահանջում է համալիր ուսումնասիրություն և հուշարձանի՝ համաշխարհային արժեք ունենալու հիմնավորում: «2021 թվականից իրականացնում ենք համաշխարհային ցանկում ընդգրկված երեք անվանակարգերի ուսումնասիրություն և դրանց կառավարման պլաններ, ինչպես նաև միջանկյալ զեկույցների պատրաստում: ՅՈՒՆԵՍԿՕ-ի գործընկերների հետ մշտական կապը ստեղծվել է. նախորդ տարի Հայաստան են ժամանել փորձագետներ Հունաստանից, Իտալիայից, Շրի Լանկայից, ինքներս մասնակցել ենք միջազգային գիտաժողովների: 2023 թ. դեկտեմբերին Պատմամշակութային ժառանգության գիտահետազոտական կենտրոնը ՅՈՒՆԵՍԿՕ-ից ևս մեկ դրամաշնորհ ստացավ, և այս պահին նախապատրաստական աշխատանքներ են ընթանում Տաթևի և Տաթևի Մեծ անապատ վանական համալիրները 1954 թ. Հաագայի կոնվենցիայի շրջանակում ուժեղացված պաշտպանության տակ առնելու համար հայտ պատրաստելու նպատակով»,- իրազեկել է Խաչիկ Հարությունյանը:
Հուշարձանների վնասումը կանխող միջոցառումների մասին
«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Արմեն Հովհաննիսյանի խոսքով՝ 2023 թ. հուշարձանների տարածքներում արձանագրվել է 85 իրավախախտում, որից երեքը՝ վանդալիզմի դեպք, 30-ի մասով հարուցվել է քրեական գործ:
«Դեպքերը կանխելու նպատակով տարբեր միջոցառումներ են իրականացվում, այդ թվում՝ համայնքային հուշարձանապահպանության աշխատանքներ, սեմինարներ, բաց դասեր: Քաղաքացին հաճախ վնաս է հասցնում հուշարձանին՝ առանց իրազեկված լինելու այդ մասին՝ իրականացնելով հողահարթեցման, շինարարական աշխատանքներ: Իրազեկման աշխատանքներով փորձում ենք ճանաչելի դարձնել և հնարավորինս կանխել դեպքերը»,- ասել է Արմեն Հովհաննիսյանը և նշել, որ 600-ից ավելի վտանգված հուշարձան կա ՀՀ տարածքում:
Հողաքանդման, վանդալիզմի դեպքերին անդրադառնալով՝ Վանյանը նշել է, որ դրանք արձանագրելիս նախարարությունը դիմում է իրավապահ մարմիններին: ԿԳՄՍ նախարարության ներկայացուցիչը կարծում է՝ արձանագրված դեպքերը պետք է պատժիչ արդյունք ունենան, որպեսզի գանձագողությունն ու հուշարձանների վնասումը հնարավորինս կանխվեն:
Ըստ Հարություն Վանյանի՝ կանխող միջոցառում իրականացնելիս նախ պետք է տարորոշել՝ ինչ բնույթի հուշարձան է և ինչ վնասվածք է հասցվել. «Հնավայրերի ու դամբարանադաշտերի դեպքում հրատապ պեղումներ պետք է իրականացվեն՝ փրկելու մնացած՝ չվանսված արժեքները՝ հնագիտական շերտերն ու առարկաները: Կարծում եմ՝ ավելի կոշտ դիրքորոշում պետք է ունենանք ժառանգությունը գիտակցաբար վնասող անձանց նկատմամբ՝ իրավական դաշտում: Ճարտարապետական հուշարձանների դեպքում, երբ ինքնագործունեությամբ երեսապատում են արել, ներկել են կամ, օրինակ, երկրորդ հարկ են ավելացրել, նման դեպքերը հնարավոր է վերացնել՝ հուշարձանը բերելով նախկին տեսքի: Իսկ եթե անդառնալի է վնասը, դա պատժելի է իրավական ընթացակարգով»:
Կոնդի հուշարձանների պահպանությունը օրենքի պահանջ է
«Կոնդը երբևէ գրանցված չի եղել իբրև պատմամշակութային հուշարձան: Կոնդում կան առանձին գրանցված շենքեր, կառույցներ և շինություններ, որոնք ունեն հուշարձանի կարգավիճակ և պետական ցուցակում ընդգրկված են կամ նորահայտ հուշարձանների կարգավիճակում են: Վերջին տարիներին հենց մեր ուսումնասիրությունների հիման վրա 10 նորահայտ օբյեկտ ընդգրկվել է նորահայտ հուշարձանների ցուցակում»,- հայտնել է Հարություն Վանյանը:
Խոսելով Կոնդի վերակառուցման մրցույթի մասին՝ Վանյանը նշել է, որ օրենքից բխող հիմնական պահանջը եղած հուշարձանների և դրանց պահպանական գոտիների ու միջավայրի պատշաճ պաշտպանությունն է:
«Բոլոր հուշարձանները պետք է պահպանվեն. դրանք պատշաճ ձևով ընդգրկված են մրցույթի տեխնիկական հայտերի մեջ: Մրցույթի մասնակիցները տեղեկացված են, թե որոնք են պատմամշակութային հուշարձանները, և որ դրանք պաշտպանված են օրենքով: Ցանկացած նախագիծ-առաջարկ պիտի ներառի դրանց բոլորի պահպանությունը՝ անկախ նրանից, թե ինչպիսի քաղաքաշինական ծրագիր կհաստատվի»,- նշել է Վանյանը՝ ընդգծելով հուշարձանների պահպանման վերաբերյալ ոչ ֆորմալ կրթության դերը. պատրաստվում են հոլովակներ երիտասարդների ու դպրոցականների համար:
ԼՂ պատմամշակութային ժառանգությունը վտանգված է
Հարություն Վանյանի խոսքով՝ Լեռնային Ղարաբաղի հուշարձանների նկատմամբ վանդալիզմի դեպքերի վերաբերյալ ԿԳՄՍ և ԱԳ նախարարությունները միջազգային գործընկերների հետ պարբերական աշխատանքներ են իրականացնում՝ օգտագործելով բոլոր խողովակները: «Պատմամշակութային ժառանգության գիտահետազոտական կենտրոն» ՊՈԱԿ-ի տնօրեն Խաչիկ Հարությունյանն իր հերթին հայտնել է, որ գործում է Լեռնային Ղարաբաղի հուշարձանների մշտադիտարկման խումբ, որն արձանագրում և փաստագրում է այն բոլոր տեսանելի, երբեմն նաև ոչ տեսանելի վանդալիզմի դեպքերը և դրանք փոխանցում համապատասխան կառույցներին: Մշտադիտարկմամբ արձանագրվում են ամենօրյա փոփոխությունները:
2020 թ․ 44-օրյա պատերազմից և 2023 թ․ սեպտեմբերի 19-ի դեպքերից հետո տարբեր միջազգային հարթակներում (ՅՈՒՆԵՍԿՕ, Եվրոպայի խորհուրդ և այլն) նիստերի, համաժողովների, գիտաժողովների ընթացքում ՀՀ ԿԳՄՍ նախարարության ներկայացուցիչները մշտապես բարձրացնում են Լեռնային Ղարաբաղի պատմության և մշակույթի հուշարձանների հետագա պահպանության հարցերը, վերհանում Ադրբեջանի կողմից իրականացված վանդալիզմի փաստերը և հրավիրում միջազգային կազմակերպությունների ուշադրությունը:
ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր ընդունել է Ֆրանկոֆոնիայի միջազգային կազմակերպության (L`OIF) Կենտրոնական և Արևելյան Եվրոպայի ֆրանսախոս տարածաշրջանային կենտրոնի (CREFECO) տնօրեն Էմմանուել Սամսոնին:
Հանդիպմանը ներկա է եղել նաև ԿԳՄՍ նախարարի տեղակալ Արաքսիա Սվաջյանը:
Ողջունելով հյուրերին՝ Ժաննա Անդրեասյանը կարևորել է համագործակցությունը ֆրանկոֆոն միջազգային կազմակերպության, մասնավորապես՝ Կենտրոնական և Արևելյան Եվրոպայի ֆրանսախոս տարածաշրջանային կենտրոնի հետ համագործակցությունը՝ ուղղված ֆրանսերենի ուսուցիչների վերապատրաստմանը և ֆրանսերենի ուսուցմանը:
Ֆրանկոֆոնիայի միջազգային կազմակերպությունը Հայաստանին է վստահել Ֆրանկոֆոնիայի միջազգային 10-րդ մարզամշակութային խաղերի անցկացումը, որը, ըստ նախարարի, շատ կարևոր ու պատասխանատու հանձնառություն է Հայաստանի համար:
«Ֆրանկոֆոնիայի միջազգային խաղերի շրջանակում մշակույթի և սպորտի ոլորտներին առնչվող միջոցառումների կազմակերպումից բացի՝ պետք է նաև էապես բարելավենք մեր երկրում ֆրանկոֆոն միջավայրը»,- ասել է Ժաննա Անդրեասյանը՝ կարևորելով Կենտրոնական և Արևելյան Եվրոպայի ֆրանսախոս տարածաշրջանային կենտրոնի հետ համագործակցությունը՝ ուղղված հատկապես Հայաստանում ֆրանսերենի մակարդակի բարձրացմանը և բարելավմանը:
Ժաննա Անդրեասյանի տեղեկացմամբ՝ ավելացել են ֆրանսերենի խորացված ուսուցում իրականացնող ուսումնական հաստատությունները. այս պահին ծրագրում ներառված է 18 դպրոց: Համագործակցության խորացման համատեքստում Ժաննա Անդրեասյանը կարևորել է ֆրանսիական կողմի աջակցությունը դասագրքերի և ուսումնական նյութերի ստեղծման ուղղությամբ՝ հատկապես հանրակրթական պետական նոր չափորոշչի ներդրմամբ պայմանավորված:
Ֆրանկոֆոն միջազգային կազմակերպության Կենտրոնական և Արևելյան Եվրոպայի ֆրանսախոս տարածաշրջանային կենտրոնի տնօրեն Էմմանուել Սանսոնը շնորհակալություն է հայտնել ընդունելության համար և կարևորել Հայաստանի ակտիվ դերակատարությունը Ֆրանկոֆոն միջազգային կազմակերպությունում: Նրա խոսքով՝ Հայաստանը բազմիցս արտահայտել է իր հավատարմությունը Ֆրանկոֆոնիայի միջազգային կազմակերպության գաղափարներին ու արժեքներին:
Էմմանուել Սանսոնը նշել է՝ CREFECO-ն պատրաստակամ է Ֆրանկոֆոն միջազգային կազմակերպության միջոցով կազմակերպել ֆրանսերենի ուսուցիչների վերապատրաստման դասընթացներ, ինչպես նաև աջակցել ուսումնական նյութերի ստեղծման հարցում:
Հանդիպման ընթացքում կողմերը քննարկել են նաև երկկողմ հետաքրքրություն ներկայացնող այլ հարցեր՝ պատրաստակամություն հայտնելով հարաբերությունների խորացման և ֆրանսերենի զարգացմանն ուղղված համատեղ այլ նախաձեռնությունների իրականացմանը:
Պորտալի նյութերը արտատպելու կամ օգտագործելու դեպքում հղումը ՀԱՅԿԱԿԱՆ ԿՐԹԱԿԱՆ ՄԻՋԱՎԱՅՐ -ին (www.armedu.am) պարտադիր է:
Պորտալը շահագործում է Կրթական տեխնոլոգիաների ազգային կենտրոնը (ԿՏԱԿ)
© Կրթական տեխնոլոգիաներին ազգային կենտրոն, 2007-2024