Երևանում երկուշաբթի բացվել է «Բարձրագույն կրթության եվրոպական չափայնության խթանում» թեմայով ձմեռային դպրոցը, որը նախատեսված է բուհերի վարչական աշխատակիցների համար:
Դպրոցը կազմակերպվել է «Ազգային զարգացման գիտակրթական կենտրոն» կազմակերպության կողմից՝ Երևանի պետական համալսարանի և Բաց հասարակության ինստիտուտի օժանդակության հիմնադրամի աջակցությամբ:
Ինչպես տեղեկացրեց «Ազգային զարգացման գիտակրթական կենտրոն» հասարակական կազմակերպության նախագահ Գայանե Ղուկասյանը, ձմեռային դպրոցը կոչված է աջակցել եվրոպական չափանիշների ներդրմանը Հայաստանի կրթական համակարգում:
Բաց հասարակության ինստիտուտի օժանդակության հիմնադրամի համակարգող Աննա Գևորգյանն իր հերթին նշեց, որ ձմեռային դպրոցը կնպաստի բարձրագույն կրթության նոր համակարգի կայացմանը:
Մինչև դեկտեմբերի 11-ը տևող ծրագրում մասնակցում է պետական և մասնավոր բուհերի ավելի քան 30 ներկայացուցիչ:
Դպրոցում դասախոսություններ են կարդալու պրոֆեսոր Էնդի Գիբսը (Նապիերի համալսարան, Էդինբուրգ) և պրոֆեսոր Թերենս Քլիֆորդ-Ամոսը (Քրայստ Չըրչ համալսարան, Քենթըրբերի): Հայաստանը ներկայացնում է ԵՊՀ ուսումնական աշխատանքների գծով պրոռեկտորի տեղակալ Արմեն Բուդաղյանը:
Դասընթացների հիմնական թեմաներն են՝ եվրոպական չափայնության խթանումը որպես Բոլոնյան գործընթացի ուղղություն, ելքային կրթական արդյունքներ, «Եվրոպական «թյունինգ» նախագիծ, համադրելի ծրագրեր կազմելու մեթոդաբանությունը, բարձրագույն կրթության բազմամակարդակ ուսումնական ծրագրեր կազմելու մեթոդաբանության մշակումը։
«Նովոստի-Արմենիա» միջազգային լրատվության գործակալություն
